Ўзбекистон Республикаси ИИВ Академиясининг 30 йиллиги муносабати билан Тошкент шаҳрида «Ҳуқуқбузарликлар профилактикаси ва жиноятчиликка қарши курашиш соҳасида етук профессионал кадрларни тайёрлаш: тенденциялар ва истиқболлар» мавзусидаги халқаро илмий-амалий конференция ўз ишини бошлади.Унда Миллий гвардия қўмондони Р.Джураев ўз маърузаси билан иштирок этди
Тадбирда мамлакатимизнинг давлат бошқарув ҳамда ҳуқуқни муҳофаза қилувчи органлари раҳбарлари, халқаро ташкилотлар, БМТ, ЕХҲТнинг Ўзбекистондаги ваколатхоналари вакиллари, Озарбайжон, Хитой, Беларусь, БАА, Эрон, Саудия Арабистони давлатларининг элчилари, шунингдек Корея, Беларусь Хитой, Россия, Саудия Арабистони, Эрон, Сингапур, БАА, Арманистон, Қозоғистон, Қирғизистон ва Ҳиндистон давлатларининг полиция олий ўқув юртлари раҳбарлари иштирок этишмоқда.
Мазкур тадбирда Ўзбекистон Республикаси Миллий гвардияси қўмондони Р.Джураев ўз маърузаси билан иштирок этиб, кириш сўзида халқаро конференция мавзусининг долзарблигига алоҳида урғу берган ҳолда конференция ишига муваффақият тилади.
Маъруза давомида ИИВ Академияси ҳамда Миллий гвардия Жамоат хавфсизлиги университети ўртасида йўлга қўйилган ўзаро ҳамкорлик натижасида бугунги кунда мақсадли кадрлар тайёрланишига эришилгани ёдга олиниб, бир қатор мисоллар келтириб ўтилди.
Шунингдек, келгусида бу каби ҳамкорлик масалаларини янги босқичга олиб чиқиш борасидаги муҳим вазифалар санаб ўтилиб, истиқболли режаларнинг амалий ижроси Мустақил давлатимиз тараққиёти йўлида муҳим аҳамият касб этиши таъкидланди.
