Ўзбекистон Республикаси Конституцияси қабул қилинганлигининг 31 йиллиги муносабати билан Миллий гвардия марказий девонида тадбир бўлиб ўтди
Мазкур тадбирни Миллий гвардия қўмондони генерал-майор Р.Джураев кириш сўзи билан очиб бериб, барча ҳарбий хизматчи ва ходимларни ҳамда уларнинг оила аъзоларини, тизим фахрийларини, шунингдек бутун халқимизни улуғ айём – “Ўзбекистон Республикаси Конституцияси қабул қилинганлигининг 31 йиллиги байрами” билан табриклаб, самимий тилакларини билдирди.
Тарихан қисқа давр мобайнида жонажон Ўзбекистонимиз мустақил ва суверен давлат сифатида жаҳон ҳамжамиятидан муносиб ўрин эгаллаб, улкан тараққиёт йўлини босиб ўтгани ва унда Ўзбекистоннинг янги таҳрирдаги Конституцияси муҳим ўрин тутгани алоҳида таъкидланди.
Қомусимизнинг асосий принциплари умуминсоний қадриятларга асосланганлиги ва уларни ҳаётга тадқиқ этишда Давлатимиз раҳбари бошчилигида катта қадамлар қўйилгани алоҳида эътироф этилди. Мамлакатимиз аҳолисининг ярмидан кўпини ёшлар ташкил этиши ва уларга муносиб ҳаёт шароитини яратишдаги барқарор иқтисодиёт, хавфсиз давлат, самарали бошқарув ва ижтимоий кафолатлар ечими мустаҳкам ҳуқуқий пойдевор бўлган – Ўзбекистоннинг янги таҳрирдаги Конституциясида ўз аксини топганига алоҳида урғу берилди.
Бу ислоҳотлар халқимизнинг эртанги кунга бўлган ишончини янада ортишига хизмат қилса, Миллий гвардия ходимлари юртимизда тинчлик ва осойишталикни таъминлаш билан халқимиз ишончини оқлаши зарурлиги таъкидланди.
Фикримизнинг мантиқий давоми сифатида Миллий гвардия қўмондони буйруғи ўқиб эшиттирилиб, “Ўзбекистон Республикаси Конституцияси қабул қилинганлигининг 31 йиллиги байрами” муносабати билан тизимда фидокорона хизматлари билан сафдошларига намуна кўрсатиб келаётган бир гуруҳ ҳарбий хизматчилар муносиб тақдирландилар.
Шундан сўнг сана муносабати билан “Конституция – бахтимиз қомуси” мавзусида маданий-маърифий тадбир ташкиллаштирилди. Унда, Миллий гвардия қўмондонлиги, Ўзбекистон Республикаси Парламенти ахборот маркази ва ҳарбий прокуратура мутасадди раҳбарлари, шунингдек тизим ходимлари, фахрийлар ва таълим муассаса ўқувчилари иштирок этишди.
Маърузачилар томонидан жонажон Ўзбекистонимизнинг янги таҳрирдаги Конституцияси тўғрисида бериб ўтган кенг тушунчалари, тадбир иштирокчиларида катта қизиқиш уйғотиб қизғин савол-жавобларга бой бўлди ва соҳа фахрийларининг эътирофига сазовор бўлди.
