“Ўзбекистон Республикаси Қуролли Кучлари шахсий таркибининг ахлоқий-руҳий таъминотини такомиллаштириш йўллари” мавзусидаги тарбиявий ва мафкуравий ишлар органи офицерлари билан услубий-амалий ўқув йиғини ўтказилди
Миллий гвардия қўмондонлиги ташаббуси билан Мудофаа вазирлиги Тоифаланган объектларни қўриқлаш қўшинлари қўмондонлиги, Ички ишлар вазирлиги Қоровул қўшинлари қўмондонлиги ва Фавқулодда вазиятлар вазирликлари ҳамкорлигида пойтахтимиздаги ҳарбий қисмлар ва Олмалиқ шаҳрида жойлашган дала ўқув полигонида “Ўзбекистон Республикаси Қуролли Кучлари шахсий таркибининг ахлоқий-руҳий таъминотини такомиллаштириш йўллари” мавзусидаги тарбиявий ва мафкуравий ишлар органи офицерлари билан услубий-амалий ўқув йиғини ўтказилди.
Миллий гвардия қўмондонлиги ташаббуси билан ҳамкорликда ўтказилган кўргазмали ўқув йиғини Жамоат хавфсизлиги университети базасида илмий-амалий конференция билан бошланди. Унда профессорлар, тарбиявий ва мафкуравий ишлар органи офицерлари ҳамда ҳарбий психологлар ўзларининг соҳага оид долзарб маърузалари билан иштирок этишди. Шундан сўнг университетда бунёд этилган мажмуавий тўсиқлар йўлагида сунъий равишда барпо этилган турли тўсиқлардан ўтиш орқали шахсий таркибнинг ахлоқий-руҳий тайёргарлигини ташкиллаштириш усуллари ўқув йиғини иштирокчиларига ҳавола этилди. Бундан ташқари дала шароитида руҳий енгиллаштириш хонасини жиҳозлаш ва унинг ишини ташкил этиш тартиби ҳақида маълумот берилди. Махсус тактик тайёргарлик машғулотлари давомида сунъий равишда жисмоний ва руҳий зўриқишларни яратиш орқали жанговар вазифани охиригача бажариш кўникмалари махсус йўлакларда кўргазмали тарзда бажарилди.
Шунингдек, ҳарбий хизматчилар томонидан ўзларига ишонч ва қатъиятлиликни ошириш учун хизмат қиладиган жанговар ҳайқириқлари эшиттирилди. Бундан ташқари ўқ отиш тайёргарлиги машғулотлари жараёнида сунъий равишда жисмоний ва руҳий зўриқишларни яратиш орқали шахсий таркибнинг душманга қарши муваффақиятли қарши туриш, билим, кўникма ва малака, жанговар маҳорати ва ўзига ишончи намойиш этилди. Илмий-инновацион ва рационализаторлик ишланмалар кўргазмаси ҳам тадбир иштирокчиларида катта таассурот қолдирди. Ўқув йиғини Мудофаа вазирлиги Тоифаланган объектларни қўриқлаш қўшинлари қўмондонлигида давом эттирилди. Ҳарбий қисм ҳудудида ахлоқи-руҳий таъминотни ташкиллаштириш ва шахсий таркибни жанговар руҳини оширишга қаратилган маънавият майдончалари ҳарбий хизматчиларни ўзига жалб этди. Тарих ва адабиётни ўзида гавдалантирган кўргазмали чиқишлар орқали руҳий ҳолатни тиклашга қаратилган тадбирлар барчага бирдек манзур бўлди. Ўқув-йиғининг иккинчи куни Мудофаа вазирлигига қарашли олмалиқ дала ўқув полигонида бўлиб ўтди.
Жанговар тайёргарлик машғулотлари давомида ҳарбий хизматчиларни экстремал вазиятдаги ҳаракатларга ахлоқий-руҳий тайёрлашнинг усул ва воситалари тушунтирилиб, руҳий зўриқишни ечишга қаратилган “Психологик тренинглар” кўргазмали тарзда амалга оширилди. Ўқув-йиғини якунлари бўйича мазкур ҳамкорликдаги тадбирларни ҳар чоракда ўтказишга келишиб олинди. Тадбир сўнгида ҳарбий хизматчилар дала-ўқув полигони ҳудудига эзгу ниятлар билан мевали дарахт кўчатларини экишди.
