Жамоат хавфсизлиги университетида“Тарих билимдони” танловининг Миллий гвардия босқичи бўлиб ўтди.
Мамлакатимизда амалга оширилаётган ёшларга оид давлат сиёсати негизида ҳам жисмоний, ҳам маънавий жиҳатдан соғлом, ҳеч кимдан кам бўлмасдан, бошини баланд кўтариб яшайдиган, Ватанимизнинг тақдири ва истиқболи учун масъулиятни ўз зиммасига олишга қодир бўлган баркамол авлодни тарбиялашдек устувор мақсад мужассам. Хусусан, жорий йилнинг 12 сентябрь куни Ўзбекистон Республикаси Жамоат хавфсизлиги университетида ҳарбий хизматчилар ва ходимлар ўртасида ташкил этилган “Тарих билимдони” танловининг Миллий гвардия босқичи ҳам амалга оширилаётган эзгу ишларнинг яна бир ёрқин исботидир. Қизғин ўтган танловда иштирокчилар «Блитс», “Тест саволлари” ҳамда “Суратдаги тарих” шартлари бўйича ўзаро беллашдилар
ва танлов натижаларига кўра ғолиблар ташкилотчилар томонидан диплом ҳамда эсдалик совғалар билан тақдирланди. Шунингдек, тадбир давомида курсантлар таркибидан иборат “Ёш театрчилар” ва “Алвон беретлар” бадиий жамоалари томонидан тақдим этилган ижодий чиқишлар тадбир иштирокчиларига алоҳида завқ бағишлади.