Жамоат тартибини таъминлаш ва жиноятчиликни барвақт олдини олишга қаратилган манзилли ишлар давом эттирилмоқда.
Давлатимиз раҳбарининг ПҚ–2 сонли қарори ижроси юзасидан ҳудудларда манзилли ишлар амалга оширилмоқда. Хусусан, Наманган вилоятида республика ишчи гуруҳи ҳамда вилоят ҳокимлиги ҳамкорлигида жамоат тартибини таъминлаш ва жиноятчиликни барвақт олдини олиш борасида амалга оширилаётган ишлар таҳлилий ва танқидий муҳокама қилинди.
Таҳлиллар натижасида айрим ҳудудларда қарор талабларини тўлиқ ва сифатли таъминлаш борасида сусткашликка йўл қўйилаётгани, масъул ташкилотлар томонидан ижро интизоми етарли даражада таъминланмаётгани қайд этилди. Шу муносабат билан аниқланган камчиликларни бартараф этиш, қарор ижросини тўлиқ таъминлаш, ижро интизомини мустаҳкамлаш ҳамда белгиланган топшириқларнинг ўз вақтида ва сифатли бажарилишини таъминлаш юзасидан аниқ вазифалар белгилаб берилди.
Йиғилиш якунида барча масъул ташкилот ва мансабдор шахсларга ПҚ–2 сонли қарор ижросини сўзсиз таъминлаш, мавжуд камчиликларни қисқа муддатларда бартараф этиш ҳамда бу борада шахсий жавобгарликни кучайтириш юзасидан қатъий топшириқлар берилди.
Шундан сўнг, Бош прокурорнинг биринчи ўринбосари Б. Валиев ҳамда Миллий гвардия қўмондони ўринбосари, полковник А. Сормонкулов раҳбарлигида Наманган вилоятида ўрганиш ишлари амалга оширилди.
Хусусан, Наманган шаҳридаги «Чорсу» маҳалласида маҳалла еттилиги, маҳалла фаоллари ҳамда ушбу ҳудудга бириктирилган масъуллар билан учрашув ўтказилиб, қарорлар ижроси доирасида амалга оширилаётган ишлар билан танишилди. Учрашув давомида “Йўл хариталари” асосида жиноятчиликка қарши курашиш, профилактик тадбирларни кучайтириш ҳамда маҳаллаларда манзилли ишларни ташкил этиш юзасидан амалий таклиф ва тавсиялар берилди.
Якунда масъул раҳбарлар томонидан маҳаллаларда жиноятчиликни барвақт олдини олиш, профилактик тадбирлар самарадорлигини ошириш ҳамда жамоат тартибини таъминлаш борасида барча куч ва воситаларни самарали сафарбар этиш зарурлиги алоҳида таъкидланди. Шунингдек, маҳаллаларни жиноятдан ҳоли ҳудудга айлантириш бўйича белгиланган вазифаларни тизимли ва манзилли ташкил этиш, аҳоли билан яқиндан ишлаш ҳамда ижро интизомини янада мустаҳкамлаш устувор вазифа этиб белгиланди.
