Ҳарбий ҳамкорлик истиқболлари муҳокама қилинди
Миллий гвардия қўмондони генерал-майор Р.Джураевнинг Ҳиндистоннинг Ўзбекистондаги Фавқулодда ва Мухтор Элчиси Маниш Прабхат билан учрашуви бўлиб ўтди.
Учрашувда Ўзбекистон ва Ҳиндистон ўртасида кўп асрлик савдо-иқтисодий, тарихий-маданий алоқалар бугунги кунда ҳам барча соҳаларда ривожланиб бораётганлиги, мамлакатларимиз Бирлашган Миллатлар Ташкилоти, Шанхай Ҳамкорлик Ташкилоти каби қатор халқаро ва минтақавий ташкилотлар доирасида яқиндан ҳамкорлик қилиб келишаётганлиги кўрсатиб ўтилди.
Мулоқот давомида Миллий гвардия ва Ҳиндистон Миллий хавфсизлик гвардияси ўртасида ўрнатилаётган ҳамкорлик алоқалари давлатларимиз ўртасида хавфсизлик ва мудофаа соҳасидаги умумий қараш ва ёндашувларга тўла мос келиши таъкидланди.
Ҳиндистоннинг Ўзбекистондаги Элчиси жаноб М.Прабхат Миллий гвардиянинг жамоат тартибини сақлаш, ички хавфсизликни таъминлаш, муҳим давлат объектларини қўриқлаш соҳаларида Ҳиндистоннинг тегишли ҳарбий ва ҳуқуқни муҳофаза қилиш идоралари билан келгуси ҳамкорлигини қўллаб-қувватлашини билдирди.
Эслатиб ўтамиз, яқинда Миллий гвардия қўмондонининг Ҳиндистон Милий хавфсизлик гвардияси Бош директори М.Ганапати билан онлайн видео мулоқоти ўтказилиб, унда икки идора ўртасида ҳамкорлик тўғрисида англашув Меморандуми имзоланган эди.
Ишчан ва самимий мулоқот руҳида ўтган учрашув якунида хавфсизликни таъминлаш соҳасидаги икки томонлама ҳамкорлик алоқаларини давом эттиришга келишиб олинди.
