Ҳиндистон Миллий хавфсизлик гвардияси билан ҳамкорлик алоқалари ўрнатилди
Ўзбекистон Республикаси Миллий гвардияси томонидан доимий равишда ўзаро манфаатли халқаро ҳамкорлик алоқаларини ўрнатиш борасида тизимли чора-тадбирлар амалга ошириб келинмоқда.
Хусусан, жорий йилнинг 25 январь куни Миллий гвардия қўмондони генерал-майор Р.Джураев ва Ҳиндистон Миллий хавфсизлик гвардияси Бош директори М.Ганапати ўртасида онлайн видеомулоқот шаклида учрашуви бўлиб ўтди.
Мулоқот давомида, Ўзбекистон Миллий гвардияси ва Ҳиндистон Миллий хавфсизлик гвардияси ўртасида икки томонлама ҳамкорлик алоқаларини ривожлантириш масалалари муҳокама этилди.
Ҳинд томони Ўзбекистон Миллий гвардияси билан ўзаро ишонч ва ҳурмат асосида икки томонлама ҳамкорлик алоқаларини ривожлантиришга тайёрлигини маълум қилиб, идоралараро ўзаро тажриба алмашиш ва хавфсизлик соҳасида қўшма ўқув машғулотлари ўтказиш тўғрисида таклиф билдирди.
Ўз ўрнида Ўзбекистон Республикаси Миллий гвардияси қўмондони Ҳинд томони билан хизмат фаолиятининг барча соҳаларида икки томонлама алоқаларни ривожлантиришга тайёрлигини маълум қилиб, Жамоат хавфсизлиги университети ва Ҳиндистон Миллий хавфсизлик гвардиясининг тегишли олий ҳарбий таълим муассасаси ўртасида ҳамкорлик ўрнатиш таклифини билдирди.
Учрашув якунида Ўзбекистон Республикаси Миллий гвардияси ва Ҳиндистон Миллий хавфсизлик гвардияси ўртасидаги ўзаро ҳамкорлик бўйича англашув Меморандумини имзолаш маросими бўлиб ўтди.
Мазкур ҳужжат икки идора ўртасидаги келгуси ҳамкорликни мустаҳкам асоси бўлиши ҳамда томонлар ўртасида жамоат тартибини сақлаш, терроризмга қарши курашиш, ҳарбий кадрларни тайёрлаш ва малакасини ошириш соҳаларида ҳамкорлик қилиш, қўшма амалий тренинглар, ўзаро танишув ташрифларини ташкил этиш имконини бериши кўрсатиб ўтилди.
Учрашув дўстона ва конструктив мулоқот руҳида ўтди.
