Айни кунларда юртимиз бўйлаб Ўзбекистон Республикаси Мустақиллигининг 35 йиллик байрами “Ягона Ватан, ягона халқ бўлиб, янги ҳаёт ва келажак яратамиз!” деган эзгу ғоя асосида кенг нишонланмоқда.
Миллий гвардия тизимида Мустақилликнинг 35 йиллиги муносабати билан тантанали тадбир ўтказилди
Улуғ айём муносабати билан Миллий гвардия тизимида ҳам тантанали тадбир бўлиб ўтди. Унда хизмат вазифаларини сидқидилдан бажариб, юксак натижаларга эришаётган ҳарбий хизматчиларнинг меҳнати муносиб эътироф этилди.
Сўнгги йилларда Президентимиз ташаббуси билан Янги Ўзбекистонни барпо этиш, юртимиз тинчлиги ва халқимиз фаровонлигини таъминлаш йўлида кенг кўламли ислоҳотлар амалга оширилмоқда. Жумладан, мамлакатимиз хавфсизлиги ва жамоат осойишталигини таъминлаш, фуқароларнинг ҳуқуқ ва эркинликларини ишончли ҳимоя қилишга алоҳида эътибор қаратилмоқда.
Ана шу эзгу мақсадлар асосида ташкил этилган Миллий гвардия қисқа вақт ичида мамлакатимиз хавфсизлик тизимида муносиб ўрин эгаллади. Бугун гвардиячилар юксак жанговар тайёргарлик, қатъият, жасорат ва Ватанга садоқат тимсоли сифатида халқимиз тинчлиги ва осойишталигини ишончли ҳимоя қилиб келмоқда.
Тантанали маросимда Президентимизнинг тегишли фармонларига мувофиқ, Миллий гвардия тизимида хизмат вазифаларини намунали бажариб, юксак натижаларга эришаётган 13 нафар ҳарбий хизматчи давлат мукофотлари билан тақдирлангани қайд этилди. Улар “Дўстлик” ордени, “Жасорат”, “Содиқ хизматлари учун” ва “Шуҳрат” медалларига муносиб кўрилди.
Миллий гвардия Марказий девонида ўтказилган тадбирда давлат мукофотлари ўз эгаларига тантанали равишда топширилди.
Тадбирда Миллий гвардия қўмондони генерал-полковник Б.Ташматов иштирок этиб, барча шахсий таркибни Мустақиллик байрами билан самимий муборакбод этди. Шундан сўнг давлат мукофотлари билан тақдирланган ҳарбий хизматчиларга орден ва медаллар топширилди.
Тантанали маросимнинг энг таъсирли лаҳзаларидан бири Ватан ҳимояси йўлида хизмат вазифасини бажариш чоғида ҳалок бўлган ҳарбий хизматчининг ота-онасига “Шуҳрат” медалининг топширилиши бўлди.
Мазкур мукофот марҳум ҳарбий хизматчининг Ватан олдидаги фидокорона хизматига берилган юксак баҳо, уни вояга етказган ота-онасига кўрсатилаётган чексиз ҳурмат ва эҳтиромнинг ёрқин ифодаси бўлди.
Шунингдек, Миллий гвардия тизимида хизмат қилаётган 600 нафардан зиёд ҳарбий хизматчига Ўзбекистон Республикаси Мустақиллигининг 35 йиллиги эсдалик нишони тантанали равишда топширилди.
Хизмат вазифаларини сидқидилдан бажариб, тизим ривожига муносиб ҳисса қўшиб келаётган ҳарбий хизматчилар ҳамда соҳа вакиллари ҳам идоравий мукофотлар билан тақдирланди. Бир қатор ҳарбий хизматчиларга навбатдаги полковник ҳарбий унвонлари ҳам тантанали равишда топширилди.
Миллий гвардия сафларида хизмат қилаётган ҳар бир ҳарбий хизматчи учун Ватан тақдири, халқ тинчлиги ва юрт осойишталигини таъминлаш энг олий мақсад саналади. Тақдирлаш маросимида янграган эзгу тилаклар, топширилган ҳар бир мукофот ва ҳарбий унвон ортида Ватанга садоқат, юксак масъулият ва фидокорона меҳнат мужассам.
Тадбир якунида Миллий гвардия Марказий девонидаги Хотира бурчагига гуллар қўйилиб, юрт тинчлиги ва осойишталиги йўлида жонини фидо қилган қаҳрамонлар хотирасига эҳтиром кўрсатилди.
