Миллий гвардия тизимида “Довюрак жангчи” интенсив синовлари ўтказилди ва унда муваффақиятли иштирок этган гвардиячилар муносиб рағбатлантирилди
Давлатимиз раҳбарининг 2021 йил 10 декабрдаги ПҚ-40-сон Қарори талабларининг амалий ижроси доирасида Миллий гвардия тизимида ҳар йили анъанавий тарзда ўтказиб келинаётган “Довюрак жангчи” интенсив синовлари — гвардиячиларнинг жанговар, жисмоний ва руҳий тайёргарлигини синовдан ўтказадиган муҳим тадбирлардан бирига айланган.
Бу йил, Навоий вилоятидаги Миллий гвардия “Кармана” дала-ўқув полигонида бўлиб ўтган мазкур синовларда 179 нафар гвардиячи иштирок этди. Улар орасида 142 нафари — яъни 80 фоизи — “Довюрак жангчи” унвонига сазовор бўлди.
Алоҳида таъкидлаш лозимки, жасорат, маҳорат ва чидамлиликни талаб қилувчи ушбу “Довюрак жангчи” синовларида, гвардиячи йигитлар қатори мард ва жасур қизларимизнинг ҳам иштирок этиши, қўмондонлик томонидан тизимда гендер тенгликни таъминлашга қаратилаётган чора-тадбирларнинг яққол намунаси ҳамда амалга оширилаётган ишларнинг самарасидир. Хусусан, ўтган йили ушбу синовларда илк бор капитан И.Асилова иштирок этиб, ўзининг матонати ҳамда тайёргарлиги билан барчага намуна бўлган бўлса, жорий йилда III даражали сержант Г.Наимова ушбу муҳим синовларда муносиб қатнашиб, ўз салоҳиятини намоён этди.
Уч босқичда ўтказилган, ўттиздан ортиқ шартларни ўз ичига олган, хусусан, комплекс куч машқлари, 30 км масофага пиёда юриш ва югуриш ҳамда ягона тўсиқлар йўлагида умумий назорат ҳамда ўқотар қуроллардан амалий отиш машқлари, шунингдек, пичоқ улоқтириш каби интенсив синовларда ҳар бир ҳарбий хизматчи жанговар руҳ, матонат, шижоат билан ўз имкониятларини амалда намоён этди.
Синовда юқори натижаларни қайд этган ва “Довюрак жангчи” унвонига сазовор бўлган гвардиячиларни тақдирлаш мақсадида Миллий гвардия Марказий девонида тантанали тадбир ташкил этилди. Унда, Миллий гвардия қўмондони генерал-майор Р.Джураев сўзга чиқиб, гвардиячилар томонидан намоён этилган тайёргарлик, интизом ва садоқатни юксак баҳолади ва “Довюрак жангчи” кўкрак нишонлари тантанали равишда ўз эгаларига топширилди.
Миллий гвардия тизимида шижоат ва масъулият, жасорат ва ватанпарварлик рамзига айланган “Довюрак жангчи” унвони ҳарбий хизматчиларни янги ютуқлар сари руҳлантираётгани баробарида, уларнинг Бурч, Садоқат, Жасорат шиори остида фидокорона хизматини муносиб рағбатлантиришда ҳам муҳим ўрин тутади.
