9 май — Хотира ва қадрлаш куни муносабати билан Миллий гвардия Маънавият ва маърифат марказида “Авлодлар учрашуви” ҳамда “Бизнинг қаҳрамонлар” китобига бағишланган маънавий-маърифий тадбир ташкил этилди.
Мазкур тадбир халқимизнинг тинчлиги ва осойишталиги йўлида фидокорона хизмат қилган, хизмат бурчини бажариш чоғида ҳалок бўлган ҳарбий хизматчилар ва ходимларнинг ёрқин хотирасини эъзозлаш, уларнинг жасорати ва матонатини ёш авлодга намуна сифатида тарғиб этиш мақсадида ўтказилди.
Тадбирда Миллий гвардия Марказий фахрийлар кенгаши аъзолари, ҳарбий хизматчилар, ўқувчи-ёшлар ҳамда хизмат бурчини бажариш вақтида ҳалок бўлган гвардиячиларнинг оила аъзолари иштирок этди.
Тадбир давомида сўз олганлар Ватан ҳимояси йўлида жон фидо қилган ҳарбий хизматчилар ва ходимларнинг қаҳрамонлиги, мардлиги ва фидойилиги ҳеч қачон унутилмаслигини, уларнинг ҳаёти ва жасорати бугунги ёшлар учун чинакам ибрат мактаби эканлигини алоҳида таъкидладилар.
Шундан сўнг хизмат вазифасини бажариш чоғида ҳалок бўлган ҳарбий хизматчилар хотирасига бағишланган видеороликлик намойиш этилди. Таъсирчан лавҳалар тадбир иштирокчиларида чуқур таассурот қолдириб, қаҳрамонлар хотирасига ҳурмат ва эҳтиром туйғуларини янада мустаҳкамлади.
Тадбирнинг асосий қисмида “Бизнинг қаҳрамонлар” китобининг яратилиши, унинг мазмун-моҳияти ҳамда ушбу китоб орқали қаҳрамон ҳарбийларнинг ҳаёти ва хизмат фаолиятини кенг жамоатчиликка етказиш борасида амалга оширилган ишлар ҳақида сўз юритилди. Жумладан, Жамоат хавфсизлиги университети кафедра бошлиғи ўринбосари, тарих фанлари доктори, майор Ғ.Мирзаев китобнинг маънавий аҳамияти, ёшларни ватанпарварлик руҳида тарбиялашдаги ўрни ҳақида ўз фикр-мулоҳазаларини билдирди.
Тадбир давомида Ватан ҳимояси ва эл-юрт тинчлиги йўлида ҳалок бўлган марҳум ҳарбий хизматчи, кичик сержант R.Tolipovning фарзанди, Жамоат хавфсизлиги университети 4-босқич курсанти Олимжонов Шухратбек Равшанбек ўғлининг самимий ва таъсирли нутқи барча иштирокчиларнинг қалбидан чуқур жой олди. У отасининг Ватанга садоқати ва мардлиги билан фахрланишини билдириб, бугунги тинч ҳаёт ортида катта жасорат ва фидойилик мужассам эканини таъкидлади.
Тадбирнинг бадиий қисми ҳам кўтаринки руҳда ташкил этилди. Мазкур маънавий-маърифий тадбир ёш авлод қалбида Ватанга муҳаббат, аждодлар хотирасига ҳурмат, жасорат ва фидойилик туйғуларини мустаҳкамлашда муҳим аҳамият касб этди.
