УЮШМАГАН ЁШЛАРНИНГ ТОҒ БАҒРИДА ЎТГАН ҲАРБИЙЧА БИР КУНИ
Бугунги кунда ёшларимизни мамлакатимизда амалга оширилаётган кенг кўламли ислоҳотларнинг фаол ва жонкуяр иштирокчисига айлантиришга қаратилган комплекс чора-тадбирлар ўз самарасини бермоқда.
Миллий гвардия қўмондонлиги ташаббуси билан пойтахтдаги уюшмаган ёшлар ва меҳрибонлик уйлари тарбияланувчилари учун ташкил этилган Бўстонлиқ тумани табиат қўйнига саёҳат шулар жумласидандир.
Ёшларнинг барчаси ҳарбий либосда, улар ҳарбийларга хос тартиб интизомни ўзларида ҳис этишди.
Даставвал саёҳат тумандаги “Чинорлар сайлгоҳи” дан бошланиб, кейинги манзил қир адирлар бағри бўлди.
Ёшларни ҳарбий хизматчилар миллий ўйинларимиз саналган Варрак сайли ва арқон тортиш мусобақаларини ўтказиш учун кутиб олишди. Ўйинларнинг қоидалари тушунтирилгач, болалар варрак учириш маҳоратларини намойиш қилишди. Арқон тортиш мусобақаси ҳам муросасизлиги билан эсда қоларли бўлди. Ҳар бир жамоа бир-биридан ўзишга ҳаракат қилди.
Табиат қўйнида турли ҳодисалар ҳам рўй бериши мумкин. Бу ҳақда ҳарбий тиббий ёрдам вакиллари жароҳат олганда дала шароитида кўрсатиладиган биринчи тез тиббий ёрдам ҳақида ёшларга тушунча бердилар.
Тушлик ҳам тоғ ён бағирларидаги табиат қўйнида ўтказилганлиги билан ёшлар ёдида бир умр сақланадиган бўлди.
Психологик тренинг эса уларни жамоавий бўлиб ишлаш, шахсни шакллантириш, эркин фикрлаш ва характерларини аниқлаш кабиларга йўналтирилди.
Тадбир сўнгида муддатли ҳарбий хизматчилар ўқувчилар учун ўз саҳна кўринишларини намойиш этишди ва фаол ёшлар ташкилотчилар томонидан рағбатлантирилди. Бир сўз билан айтганда уларнинг бир куни жуда мазмунли ва таассуротларга бой тарзда ўтказилди.
