ХАЛҚАРО ҲАМКОРЛИКНИНГ ЯНГИЧА ЁНДАШУВИ
Миллий гвардия ташаббуси билан Ҳиндистон Миллий хавфсизлик гвардияси бош директори М.А. Ганапати бошчилигидаги делегация илк бор Ўзбекистонга расмий ташриф буюрди.
Бундан аввал, жорий йилнинг 25 январь куни Ўзбекистон Республикаси Миллий гвардияси қўмондони генерал-майор Р.Джураевнинг Ҳиндистон Миллий хавфсизлик гвардияси бош директори М.А. Ганапати билан видео-конфренц-алоқа шаклида ушрашуви ўтказилиб, унда бошқарма раҳбарлари томонидан ҳамкорликнинг истиқболли йўналишлари белгилаб олдинган ҳамда Ўзбекистон ва Ҳиндистон Миллий гвардияси ўртасида ўзаро англашув меморандуми имзоланган эди.
Миллий гвардия Марказий девонида мутассади раҳбарларининг тантанали йиғилиши бўлиб ўтди. Мазкур йиғилишда Миллий гвардия вакиллари, Ҳиндистон делегация аъзолари, шунингдек, мамлакатимиздаги Ҳиндистон элчихонасидан ҳарбий атташе иштирок этди.
Мулоқот чоғида амалий ҳамкорликни янада кенгайтириш ва идоралараро ҳамкорликни кучайтириш масалалари муҳокама қилинди.
Ҳиндистон делегацияси раҳбари ўз нутқида самимий қабул учун миннатдорлик исҳор этиб, Ҳиндистон томон хавфсизлик ва терроризмга қарши курашиш соҳасида тажриба алмашиш ҳамда қўшма амалий тадбирлар ташкил этишга тайёрлигини билдирди.
Тадбир якунида 2022-2024 йилларга мўлжалланган амалий ҳамкорлик режаси имзоланди. Ушбу режада жанговар ва махсус тайёргарлик соҳасида ўзаро тажриба алмашиш бўйича қатор қўшма, амалий тадбирларни амалга ошириш кўзда тутилган.
Шундан сўнг, Миллий гвардия Марказий девони ҳовлисида анъанавий дарахт экиш маросими бўлиб ўтди.
Ташриф дастурига кўра, Ҳиндистон делегацияси Ўзбекистон Республикаси Жамоат хавфсизлиги университетига, шунингдек, Миллий гвардиянинг Тошкент шаҳри ва Бухоро вилояти бўйича бошқармаларига ташриф буюради.
Меҳмонларни қабул қилиш дастури доирасида Ўзбекистоннинг тарихий жойлари ва шаҳарларига саёҳатлар кўзда тутилган.
Делегациянинг ташрифи анъанавий дўстона муҳитда, ишонч ва ўзаро ҳурмат руҳида ўтмоқда.
Халқаро ҳамкорлик бошқармаси
