Ҳамкорлик истиқболлари муҳокама қилинди
Ўзбекистонга ташрифи давомида Америка Қўшма Штатларининг Миссисипи штати Миллий гвардияси қўмондони генерал-майор Женсон Бойлзнинг жорий йилнинг 29 март куни Миллий гвардия қўмондони генерал-майор Р.Джураев билан учрашуви бўлиб ўтди.
Учрашувда АҚШнинг Ўзбекистондаги Фавқулодда ва Мухтор Элчиси Дэниел Розенблюм ҳам иштирок этди.
Мулоқот давомида томонлар ўзаро фаолиятга оид масалаларни муҳокама қилишди. Хусусан, генерал-майор Ж.Бойлз Миллий гвардия вакилларининг мамлакатдаги табиий офатлар, шу жумладан Катрина тўфони оқибатларини бартараф этишдаги иштироки тўғрисида ўз фикрларини билдирди.
Учрашувда табиий ва техноген тусдаги фавқулодда ҳолатлар оқибатларини бартараф этиш, мураккаб шароитларда биринчи ёрдам кўрсатиш каби йўналишларда ўзаро тажриба алмашиш, амалий семинар ва машғулотлар ўтказишга келишиб олинди.
Ташриф доирасида АҚШ делегацияси Миллий гвардия Жамоат хавфсизлиги университети, Бухоро вилояти ва Тошкент шаҳар Бектемир тумани Қўриқлаш бошқармалари фаолияти билан ҳам яқиндан танишдилар.
Ташриф юқори савияда ўзаро дўстона руҳда амалга оширилди.
Миллий гвардия Халқаро ҳамкорлик бошқармаси
