РОСГВAРДИЯ БИЛAН ҲAМКОРЛИКНИНГ ЯНГИ БОСҚИЧИ
Ўзбекистон Республикаси Миллий гвардияси ташкил этилганидан кейин биринчилардан бўлиб Россия Федерацияси Миллий гвардияси Федерал хизмати билан ўзаро ҳамкорлик йўлга қўйилган.
2018-йилда Ўзбекистон Республикаси Миллий гвардияси ва Россия Федерацияси Миллий гвардияси қўшинлари Федерал хизмати ўртасида ҳамкорлик тўғрисидаги Битим имзоланган бўлиб, бу томонларнинг узоқ муддатли ҳамкорлиги ва мустаҳкам алоқалар ўрнатилишига замин яратди.
Россия томонининг таклифига биноан Ўзбекистон Республикаси Миллий гвардияси делегациясининг Қўмондон генерал-майор Р.Джураев бошчилигидаги расмий ташриф Россия Федерациясига илк маротаба амалга оширилди.
Учрашув мобайнида икки томон раҳбарлари томонидан, хавфсизлик масалалари ва кадрлар тайёрлаш соҳасидаги ўзаро ҳамкорликни мустаҳкамлаш ҳамда ривожлантириш муҳимлиги алоҳида таъкидланди.
Йиғилиш доирасида жамоат хавфсизлигини таъминлаш ва ҳарбий кадрлар тайёрлаш соҳасида ўзаро тажриба алмашиш бўйича амалий чора-тадбирларни амалга оширишга қаратилган ва 2022-йилга мўлжалланган Ҳамкорлик режаси имзоланди.
Ташриф дастурига мувофиқ, делегация аъзолари Москва шаҳридаги Росгвардия Бош бошқармасида ҳам бўлиб, унда бўлинмаларнинг жанговар-хизмат фаолияти, техника ва қурол аслахалари, шунингдек тезкор махсус отрядининг кўргазмали чиқиши билан танишдилар.
