Болажонлар учун Ўзбекистон давлат ёш томошабинлар театрида спектакль намойиш этилди
Ҳар йили болажонлар Янги йил байрамини интизорлик билан кутишади. Байрамнинг интиқиб кутилишига сабаб турфа хил совғалар билан бир қаторда қишки таътил кунларининг бошланишидир. Таъкидлаш керакки, Миллий гвардия тизимида ҳам ҳарбий хизматчилар ва уларнинг оила аъзоларини ижтимоий қўллаб-қувватлаш мақсадида маданий-маърифий тадбирлар мунтазам равишда ўтказилади. Жумладан, куни кеча пойтахтимизда жойлашган Ўзбекистон давлат ёш томошабинлар театрига Миллий гвардиянинг Тошкент вилоятида жойлашган ҳарбий қисми ҳарбий хизматчилари оила аъзоларининг ташрифи ташкиллаштирилди.
Театрда болажонлар янги йил байрами муносабати билан намойиш этилаётган “Game over” спектаклини томоша қилдилар. Спектакль аввалида болажонлар билан Қорбобо ва унинг набираси Қор қиз жонли мулоқот қилди. Болажонлар уларга ўзлари мактаб ва боғчада ёд олган шеър ва ашулаларни айтиб беришди.
Спектакл қаҳрамонлари этиб Марио, Соник, Алиса, Пубг сингари замонавий технологиядан бохабар болаларга таниш бўлган персонажлар танланган. Спектакль бугуннинг долзарб муаммоларидан бири, болаларнинг виртуал оламга ҳаддан ортиқ ружу қўяётганликлари, интернет тармоғидан доим ҳам самарали фойдаланмаётгани, ота-оналар ўз фарзандларини рағбатлантириш мақсадида олиб бераётган замонавий гаджетлар уларни реал ҳаётдан, жисмоний ҳаракатдан узоқлаштираётгани акс этирилтган. Воқеалар виртуал ўйинларга берилиб мактабдаги кўрсаткичлари пасайиб кетган Шерзод исмли болакай виртуал оламга тушиб қолиши атрофида ривожланади.
Турли хил куй-қўшиқлар, спектакль қаҳрамонларининг бевосита болалар билан интерактив мулоқотга бой саҳналари ва ранг-баранг костюмлар болажонларда юқори байрамона кайфият уйғотди.
“Game over” спектакли сеанслари ҳали давом этади. Сиз ҳам янги йилни “виртуал олам” саргузаштлари билан кутиб олинг.
